प्रधानमन्त्री मोदीको ट्वीटर अकाउन्ट ह्याक गरेर यस्तो अनौठो ट्वीट

काठमाडौ । भारतीय प्रधानमन्त्री नरेन्द्र मोदीको ट्वीटर अकाउन्ट ह्याक भएको छ। उनले चलाउने ब्यक्ति ट्वीटर एकाउण्ट ह्याक भएर असम्बन्धित कुरा राखिएका छन् । उनका लाखौं फलोअर्स छन् । ट्वीटर अकाउन्ट बिहीबार बिहान ह्याक भएपछि अनुसन्धान सुरु भएको छ ।

ह्याकरले मोदीको अकाउन्टबाट क्रिप्टोकरेन्सीसँग सम्बन्धित श्रृंखलाबद्ध ट्वीट गरेका छन्। ट्वीटमा भारतले क्रिप्टोकरेन्सी सुरुवात गरेकाले त्यसमार्फत् दान गर्न भनिएको छ। ‘अहिले भारतले क्रिप्टोकरेन्सी सुरु गरेको छ’, ट्वीटरमा भनिएको छ, ‘कोभिड–१९ का लागि म तपाईँ सबैसँग प्रधानमन्त्री राष्ट्रिय राहत कोषलाई यसमार्फत् दान गर्न अपील गर्दछु।’ भेरिफाई भएको उक्त अकाउन्टमा २५ लाख फलोअर रहेका छन्।

प्रधानमन्त्री मोदीको ट्वीटर ह्याक भएकोबारे अनुसन्धान भइरहेको ट्वीटरका प्रवक्तालाई उद्दृत गर्दै बीबीसीले जनाएको छ। ‘सक्रियताका साथ हामी अनुसन्धान गरिरहेका छौँ’, ट्वीटरले भनेको छ, ‘यस समयमा कुनै थप अकाउन्टमा असर परेको जानकारी छैन।’ अहिले भने प्रधानमन्त्री मोदीको व्यक्तिगत वेबसाइटमा ६ करोड १८ लाख फलोअर भएको ‘नरेन्द्र मोदी’ ट्वीटर अकाउन्ट लिंक भएको छ।

ह्याकरले हाई प्रोफाइल भएका व्यक्तिको ट्वीटर अकाउन्ट ह्याक गर्दै आइरहेका छन्। यसअघि अमेरिकी राष्ट्रपतिको चुनावका उम्मेदवार जोय बाइडन, पूर्वराष्ट्रपति बाराक ओबामा लगायतका ट्वीटर पनि ह्याक गरिएका थिए।

प्रतिक्रिया दिनुहोस