सर्लाहीको हजरियामा बाग्मती नदीले बाँध भत्कायो, खेत कटान गर्न थालेपछि किसान चिन्तित

सर्लाही, असार २७ गते । सर्लाहीको बरहथवा नगरपालिका–१, हजरिया खर्सालघाटमा बाग्मती नदीले बाँध भत्काएर खेत कटान गर्न थालेपछि स्थानीय किसान चिन्तित भएका छन् ।
लगातारको वर्षापछि बाग्मती नदीमा आएको बाढीले खर्सालघाटमा भर्खरै कसिएको बाँध, तारजाली र तटबन्ध सबै बगाएको छ । प्रदेश सभा सदस्य वीरेन्द्र सिंहको निर्वाचन क्षेत्र विकास कोषको २५ लाख रुपियाँबाट बाँध, बरहथवा नगरपालिकाको १५ लाख रुपियाँले डाइभर्सन र नदी नियन्त्रण कार्यालय परवानीपुर, बाराको तर्फबाट केही रकम खर्च गरी तारजाली कस्ने काम भएको थियो ।

शनिबार विहानसम्म ती सबै संरचना नदीमा बाढीले बगाएर उखु, धान र मकै बाली लगाएको खेतीयोग्य जमिन कटान गरिरहेको बरहथवा नगरपालिका–२, का मिलनकुमार राउतले जानकारी दिनुभयो । उहाँका अनुसार नदीमा पानीको बहाव बढ्दै जाँदा बरहथवा नगरपालिकाको वडा नं. १, ३, ४, १४ र १५ का बस्तीहरु समेत जोखिममा परेका छन् ।
नदीले तीव्र रुपमा कटान गरिरहे पनि जनप्रतिनिधिहरुले चासो नदिएको भन्दै स्थानीय किसानहरु आक्रोशित बनेका छन् । बरहथवा नगरपालिका–१, का वडाध्यक्ष रत्नबहादुर गिरीले नदीमा पानीको बहाव बढ्दा खर्सालघाट क्षेत्रमा हरेक वर्ष यस्तो समस्या आउने गरेको बताउनुभयो ।

वर्षा हुनेक्रम बढेसँगै सर्लाहीमा पानीको उचित निकास नरहेका होचा भागहरु डुबानमा परेका छन् । हरेक वर्ष डुबानको चपेटामा पर्ने सदरमुकाम मलङ्गवास्थित भाडसर क्षेत्रमा यो वर्ष पनि डुबानको समस्या सुरु भएको छ । वर्षौंदेखि जीर्ण रहेका जिल्लाको पूर्व–पश्चिम हुलाकी राजमार्गसहित भित्री ग्रामीण सडकहरु लगातारको वर्षाले हिलाम्मे र जलमग्न भएका छन् ।

सर्लाहीका प्रमुख जिल्ला अधिकारी मोहनबहादुर जिसीले पानीको निकास नरहेका र खेतपाती हुने ठूला फाँटहरुमा पानी जमेको भएपनि ठूलो किसिमको कटान तथा डुबानको समस्या नरहेको बताउनुभयो । जिल्लामा बाग्मती नदीमा पानीको बहाव धेरै भएपनि लखन्देही, फूल्जोर, कालिन्जोर, मनुष्मारा, सफाहा, बाँके जस्ता खोलामा बाढीको अवस्था सामान्य नै छ ।

सँधै हिँड्डुल गर्ने खोलामा बाढी आइरहँदा चुरेभेगमा पर्ने नारायणखोला, परवानीपुर, कालिन्जोर लगायत क्षेत्रका केही बस्तीमा भने आवातजावत ठप्प भएको छ । खोलामा पुल नभएका ठाउँहरुमा एक गाउँबाट अर्को गाउँसम्म ओहोरदोहार गर्न समस्या भएको स्थानीय वासिन्दाले बताएका छन् ।

यस अनलाइनमा प्रकाशित भएको समाचारमा कुनै सल्लाह वा सुझाव दिनुपरेमा [email protected] मा इमेल पठाउनुहोला । हामी फोन भन्दा पनि इमेलमा कुराकानी गर्न रुचाउँछौं ।

प्रतिक्रिया दिनुहोस