चीनद्वारा दक्षिण चीन सागरमा नौसैनिक र हवाई गस्तीमा वृद्धि

बेइजिङ— चिनियाँ सेनाले पछिल्लो समय दक्षिण चीन सागरमा विवादित स्कारबोरो शोल वरपर नौसैनिक र हवाई गस्ती सञ्चालन गरेको चिनियाँ सरकारी सञ्चारमाध्यम ग्लोबल टाइम्सले जनाएको छ ।

ग्लोबल टाइम्स अनुसार पिपुल्स लिबरेसन आर्मी (पीएलए) को दक्षिणी थिएटर कमाण्डले ह्वाङ्यान डाओ भनिने क्षेत्रमा गस्ती गरेको उल्लेख गरेको छ । फिलिपिन्सले यस क्षेत्रलाई पानाटाग शोल भन्ने गरेको छ ।

फिलिपिन्सको लुजोन टापुबाट २२० किलोमिटर पश्चिममा रहेको शोललाई चीन र फिलिपिन्स दुवैले दाबी गरेका छन्। सन् २०१२ मा दुई देशबीचको क्षेत्रीय विवादमा उल्लेखनीय वृद्धि भएको तनावपूर्ण टकरावपछि उक्त क्षेत्र चीनको नियन्त्रणमा रहेको छ।

फिलिपिन्स सरकारले चिनियाँ सरकारको यस किसिमको गतिविधिलाई विरोध गरेको छ । यसैबीच, फिलिपिन्सले विवादित क्षेत्रसँग सम्बन्धित दुईवटा विधेयकहरू पारित गरेको छ । नयाँ विधेयकले फिलिपिन्सको समुद्री सिमाना स्प्रेटली टापुको आधारभूत रेखाहरूबाट १२ समुद्री माइलसम्म रहेको उल्लेख गरेको छ ।

चीनले फिलिपिन्सले जारी गरेको नयाँ विधेयकको निन्दा गर्दै क्षेत्र अस्थिर भएको दाबी गरेको छ । रेडियो फ्री एशियाका अनुसार, चीनले फिलिपिन्सको विशेष आर्थिक क्षेत्रभित्र पर्ने शोल वरिपरि आफ्नो क्षेत्रीय समुद्रको लागि आधारभूत घोषणा गरेको छ। चीनले फिलिपिन्सबाहेका अर्को देशको भूभागमा पर्ने ६४ वटा टापुमाथि आफ्नो दाबी गर्दै आएको छ ।

दशकौंदेखि, चीनले दक्षिण चीन सागरका केही टापुहरूमा दाबी गर्ने विषयमा धेरै देशहरूसँग क्षेत्रीय विवादमा संलग्न छ । चीनसँग ब्रुनाई, भियतनाम, मलेसिया र फिलिपिन्सको सामुन्द्रिक विवाद रहँदै आएको छ ।