बाहिर आकाशमा बिजुली चम्किरहेको अवस्थामा, मोबाइल चार्जमै राखेर इयरफोन लगाउँदा करेन्ट लागेर युवतीको मृत्यु !

एजेन्सी । ब्राजिलकी एक १७ वर्षीया विद्यार्थीको मोबाइल चार्ज गर्दैगर्दा कानमा इयरफोन लगाउँदा करेन्ट लागेर मृत्यु भएको बताइएको छ । लुइजा पीहेइरो नाम गरेकी युवतीलाई भुइँमा अचेत अवस्थामा लडिरहेको भेट्टाएपछि परिवारले उनलाई तुरुन्तै अस्पताल पुर्याएको डेलीमेलले आफ्नो समाचारमा उल्लेख गरेको छ ।

ब्राजिलको राइको फ्रीओमा बस्ने लुइजालाई आइतबार अस्पताल पुर्याइएपनि चिकित्सकहरुले उनको ज्यान बचाउन नसकेको बताइएको छ ।

उनकी हजुरआमाले चिकित्सकलाई बताएअनुसार उनी लड्दा उनको कानमा इयरफोन टाँसिएको थियो भने चार्ज भइरहेको उनको फोन पूर्ण रुपमा नष्ट भएको बताइएको छ । आफन्तहरुले उनको करेन्ट लागेरै मृत्यु भएको दाबी गरिरहेको स्थानीय सञ्चार माध्यमले बताएका हुन् ।

उनले चार्ज गर्दै फोन चलाउँदा फोनको केही भाग पग्लिएपछि इयरफोनमार्फत उनलाई करेन्ट लागेको हुन सक्ने अनुमान गरिएको छ ।

उनलाई करेन्ट लागेको एक घण्टापछि मात्र चिकित्सककहाँ पुर्याइएको घटनापछि अस्पतालले खुलासा गरेको हो । उनलाई करेन्ट लागेको समयमा पानी परेको थिएन तर आकाशमा नजिकै कतैतिर बिजुली चम्किरहेको बताइएको छ ।

उनलाई के कसरी करेन्ट लाग्यो भन्नेबारे थप अनुसन्धान भइरहेको स्थानीय सञ्चारमाध्यमलाई उद्धृत गर्दै डेलीमेलले जनाएको छ ।