बहुप्रतिक्षीत जनकपुर जयनगर रेलको स्पीड परिक्षण आज गरिने

गत असोज ३ गते नेपाल आइपुगेको बहुप्रतिक्षीत जनकपुर जयनगर रेलको स्पीड परिक्षण आज हुने भएको छ । आज ट्रयाकको गति परिक्षण गरिने रेल विभागका महाप्रबन्धक गुरु भट्टराईले गोरखाली खबरलाई बताए।

उनका अनुसार रेल्वे लिकको ‘स्पिड’ र ‘सर्टिफिकेसन’ गर्ने काम हुनेछ । उनले भारतको इस्ट–सेन्ट्रल रेल्वेको डिजल लोकोमोटिभ रेलद्वारा ‘ट्र्याक स्पिड’ परीक्षण गरिने जानकारी दिए । उनले भने, ‘ट्र्याक स्पिड परीक्षण रेल सेवा सञ्चालन गर्नुपूर्वको महत्वपूर्ण प्रक्रिया हो । स्पिड परीक्षण गर्दा रेलको स्पिड १२० किमी प्रतिघण्टा हुने भएकाले रेल्वे ट्र्याकमा सुरक्षा महत्वपूर्ण हुन्छ ।’

महाप्रबन्धक भट्टराईले आफ्नो सामाजिक सञ्जाल फेसबुकमार्फत आज रेल्वे ट्र्याक वरपरका आम नागरिकलाई ट्र्याकमा मान्छे, गाई, भैँसी चौपाया, साइकल, मोटरसाइकल, बालबच्चा नछाड्न र ट्र्याकबाट दूरी कायम गरिदिन अनुरोध गरेका छन् । उनले परीक्षणका क्रममा ट्र्याक तथा स्टेशनहरूमा पर्याप्त प्रहरी तथा कर्मचारी खटाइने बताए ।

आजको परिक्षण पछी रेल्वे ट्रयाकमा कुनै खराबी नदेखी रेलमा कुनै खराबी नदेखीएमा नेपाललाई हस्तानतरण गरिने छ । रेल यहि महिना भित्र नियमित रुपमा सञ्चालनमा आउने भट्टराईले बताएका छन् ।