राजकाज त्यागेर प्रेमीसंग विवाह गर्दै राजकुमारी, ऋण तिर्न नसकेर विवाह रोकिएका कुमरोले राजकुमारीलाई बेहुली बनाउन पाए

एजेन्सी । नेपालीहरुमा एउटा भनाई छ । विवाह को संग हुने भन्ने कुरा पहिले नै ताकिएको हुन्छ । जतिसुकै ठूलो ब्यवधान भएपनि भावीले लेखेकै ब्यक्तिसंग विवाह हुनेछ । तर कतिपय घटनामा यो भनाई वास्तविकता नै होकी भन्ने संयोग बन्छ ।

वर्षौंको विवादपछि जापानकी राजकुमारी माकोले आफ्ना पूर्व सहपाठी साथीसँग बिहे गर्दैछिन् । यसै महिना उनको बिहे हुनेछ । प्रेमीसंग विवाह गरेपछि उनले राजकिय सम्मान सबै त्याग्नेछिन् । यो विवाह २६ अक्टुबर (६ कात्र्तिक) मा हुने तय भइसकेको छ । राजकुमारीसँग बिहे गर्न लागेका कुमोरो सामान्य परिवारका व्यक्ति हुन् ।

उनी लामो समयदेखि राजकुमारीसँग प्रेममा थिए । २०१८ मै उनीहरुले बिहे गर्न खोजेका भएपनि त्यो सम्भव भएन । कुमोरोको आमाले पूर्व प्रेमीसंग लिएको ऋण तिर्न नसकेका कारण उनी आर्थिक समस्यामा थिए ।

विवाहपछि माको र कुमोरो अमेरिका जाने बताइएको छ । उनीहरुको विवाहबारे अहिले जापानका स्थानीय पत्रपत्रिकाहरुमा ठूलै चर्चा भइरहेको छ । आफ्नो परिवारबारे भइरहेको टिका टिप्पणीका कारण राजकुमारी निकै विचलित बनेको इम्पेरियल हाउसहोल्ड एजेन्सीले जनाएको छ । यसअघि राजकुमारीकी ठूला–आमा अर्थात् रानी मासाकोले पनि छोरा नजन्माएको भन्दै आलोचित हुनुपरेको थियो ।

राजकुमारीका पिता फुमिहितो वर्तमान राजा नारुहितोका भाइ हुन् । सम्राट नारुहितोका छोरा छैनन् । त्यसैले, दाजुपछि फुमिहितो नै राजगद्दीका उत्तराधिकारी हुन् । माकोका भाई हिसाहितो राजगद्दीको उत्तराधिकारीको सुचीमा दोस्रो स्थानमा छन् ।

२०१२ मा पहिलो भेट
राजकुमारी माकोले सन् २०१२ मा पहिलोपटक कोमुरोलाई भेटेकी थिइन् । उनीहरु टोकियोस्थित इन्टरनेशनल क्रिष्ट्रियन विश्वविद्यालयमा सहपाठी थिए । २०१७ मा उनीहरुबीच इन्गेजमेन्ट भएको थियो । अर्को वर्ष बिहे हुने तय थियो । तर आर्थिक समस्याका कारण पुरा भएन ।

माकोले विहेपछि १३ लाख अमेरिकी डलर रकम भुक्तानी पनि लिने छैनन्, यो रकम प्रायः शाही परिवारबाट हटेका व्यक्तिहरुलाई एकमुष्ट रुपमा दिइन्छ । उनको विवाह शाही समारोह र परम्पराअनुसार पनि हुनेछैन । शाही परिवारमा परम्परा ननिभाउने र रकम पनि नलिने उनी पहिलो महिला हुनेछिन् । जापानी नियमअनुसार शाही परिवारका महिला सदस्यले सर्वसाधारणसँग विवाह गरेपछि आफ्नो हैसियत त्याग्नुपर्छ, जबकी पुरुष सदस्यमा यो लागू हुँदैन ।