भारतीय पर्यटक आगमनमा २० प्रतिशत वृद्धि गर्ने लक्ष्यसहित ताइवान नयाँ पर्यटकीय योजना

ताइपेई— ताइवान पर्यटन प्रशासन (टीटीए) ले भारतमा आफ्नो उपस्थितिलाई बलियो बनाउँदै भारतीय पर्यटकहरूको आगमनमा २० प्रतिशत वृद्धिको लक्ष्य राखेको छ।

हालै सम्पन्न साउथ एशियन ट्राभल एण्ड टुरिजम एक्सचेन्ज २०२५ (एसएटीटीई) का अवसरमा सञ्चारकर्मीसँग कुरा गर्दै ताइवान पर्यटन प्रशासन (टीटीए) सिंगापुर कार्यालयका निर्देशक पल शिहले सन् २०२४ मा भारतबाट ३८,००० पर्यटक भित्र्याउने लक्ष्य राखिएको जानकारी दिए।

कुल अन्तर्राष्ट्रिय पर्यटक आगमन करिब ७ दशमलव ५ मिलियन पुग्ने अपेक्षा गरिएको छ। भारतबाट ताइवानतर्फको पर्यटन बजारको सम्भावना प्रति आफूहरू निकै आशावादी रहेको उनले उल्लेख गरे। भारत भ्रमणको क्रममा शिहले भारतीय पर्यटन व्यवसायका प्रमुख साझेदारहरूसँग उच्च—स्तरीय बैठकहरू गर्दै ताइवान—भारत पर्यटन सम्बन्धलाई अझ प्रगाढ बनाउन पहल गरे। शिहका अनुसार जनवरी २०२४ देखि ताइवान पुनः भारतीय बजारमा सक्रिय भएको छ। रोडशो, एफएएम टुर, डिजिटल प्रवद्र्धन तथा विभिन्न व्यापारिक र उपभोक्ता केन्द्रित गतिविधि मार्फत ताइवानलाई भारतीय यात्रुहरूका लागि आकर्षक गन्तव्यका रूपमा पुनः स्थापित गर्न प्रयास गरिरहेको छ।

भारतीय आउटबाउन्ड पर्यटन २०२४ मा १० प्रतिशतले वृद्धि भएको छ, त्यही समयमा ताइवानले जनवरीदेखि अक्टोबर २०२४ सम्म ३१,७६६ भारतीय पर्यटक स्वागत गर्‍यो, जुन अघिल्लो वर्षको तुलनामा २० प्रतिशत बढी हो। यो वृद्धि निरन्तर व्यापारिक साझेदारी, प्रचारात्मक कार्यक्रम, प्रभावशाली मार्केटिङ, डिजिटल प्रवद्र्धन र मिडिया संलग्नताको प्रतिफल हो। ताइवानले यस अवधिमा कुल ६ दशमलव २ मिलियन अन्तर्राष्ट्रिय आगन्तुकहरू भित्र्याएको छ, जुन २०२३ को तुलनामा २४ दशमलव ५ प्रतिशत वृद्धि हो।

ताइवानले व्यापारिक प्रवद्र्धन तथा उपभोक्ता केन्द्रित गतिविधिलाई समायोजन गर्दै भारतीय साझेदारहरूलाई ताइवान प्रवद्र्धन गर्न सजिलो बनाइरहेको छ। विशेषगरी, इन्सेन्टिभ टुरिज्म (प्रोत्साहनात्मक भ्रमण) मा केन्द्रित भएर सन् २०२४ मा ठूलो उपलब्धि हासिल गरिएको छ। यसै महिनामा एशियन पेन्ट्सका ११०० भन्दा बढी प्रतिनिधिहरू ताइवान भ्रमण गरेका छन्। सन् २०२५ का लागि ताइवानले इन्सेन्टिभ टुरिज्म र विलासी यात्रा मा केन्द्रित विशेष प्रचार अभियान सञ्चालन गर्ने, भारतीय व्यापार साझेदारहरूसँग अझ बलियो सम्बन्ध निर्माण गर्ने, भारतीय पर्यटकहरूका लागि सुरक्षित गन्तव्यको रूपमा प्रवद्र्धन गर्ने, जसमा भारतीय खाना (जैन भोजनसहि)०, उत्कृष्ट यातायात सुविधा, सहज उडान जडान, र ठूला कार्यक्रम आयोजनाका लागि उपयुक्त पूर्वाधारलाई प्राथमिकता दिने योजना बनाएको छ।

साथै, अनलाइन ट्राभल एजेन्सी र एयरलाइन्सहरूसँग सहकार्य गर्दै भारतीय पर्यटकहरूका लागि विशेष प्याकेज निर्माण गर्ने लक्ष्य राखिएको छ। पूर्वी भारत तथा दोस्रो श्रेणीका भारतीय शहरहरूमा समेत आफ्नो उपस्थिति विस्तार गर्दै बजारलाई अझ फराकिलो बनाउने उद्देश्य राखिएको छ।