आर्थिक संकट बढ्दै जाँदा पाकिस्तानको ऋण ४,३०४ अर्ब पाकिस्तानी रुपैयाँले वृद्धि

इस्लामाबाद— बढ्दो आर्थिक संकटको बीचमा, चालू आर्थिक वर्षको पहिलो आठ महिनामा पाकिस्तानको ऋण ४,३०४ अर्ब पाकिस्तानी रुपैयाँले वृद्धि भएको एआरवाई न्यूजले आधिकारिक कागजातहरू उद्धृत गर्दै उल्लेख गरेको छ।

अक्टोबरसम्म, कुल ऋण ६९ दशमलव ११४ ट्रिलियन पाकिस्तानी रुपैयाँ पुगेको छ, जुन फेब्रुअरीमा ६४ दशमलव ८१० ट्रिलियन पाकिस्तानी रुपैयाँ थियो ।

पाकिस्तानमा आर्थिक वर्ष जुलाई १ देखि सुरु भई जुन ३० मा अन्त्य हुने गर्दछ ।

एआरवाई न्यूजका अनुसार यस अवधिमा घरेलु ऋण ४,५५६ अर्ब रुपैयाँले बढेको छ, जबकि विदेशी ऋण २५१ अर्ब रुपैयाँले घटेको छ।

फलस्वरूप, अक्टोबरसम्म घरेलु ऋण ४७ दशमलव २३१ ट्रिलियन पाकिस्तानी रुपैयाँ पुगेको छ, जुन फेब्रुअरीमा ४२ दशमलव ६७५ ट्रिलियन पाकिस्तानी रुपैयाँ थियो। अर्कोतर्फ, सोही अवधिमा विदेशी ऋण २२ दशमलव १३४ ट्रिलियन पाकिस्तानी रुपैयाँबाट घटेर २१ दशमलव ८८४ ट्रिलियन पाकिस्तानी रुपैयाँ पुगेको छ।

द एक्सप्रेस ट्रिब्यूनअनुसार, पाकिस्तानले चीन—पाकिस्तान आर्थिक करिडोर अन्तर्गत विद्युत खरिद सम्झौताहरूको संशोधन सहित प्रमुख सर्तहरू समयमै पूरा गर्न असफल भएपछि गत हप्ता विश्व बैंकले पाकिस्तानलाई ५०० मिलियन अमेरिकी डलरभन्दा बढीको ऋण रद्द गरेको छ ।

वाशिंगटन(आधारित ऋणदाताले चालू आर्थिक वर्षमा कुनै पनि नयाँ बजेट समर्थन ऋण प्रदान नगर्ने घोषणा पनि गरेको छ, जसले सरकारको २ अर्ब अमेरिकी डलर नयाँ ऋण प्राप्त गर्ने अपेक्षालाई असर गर्न सक्छ।

एआरवाई न्यूजका अनुसार, चालू आर्थिक वर्षको पहिलो दुई महिनामा संघीय ऋण १,४४८ अर्ब रुपैयाँले बढेको छ, जसमा अगस्टमा मात्र ७३९ अर्ब रुपैयाँ थपिएको स्टेट बैंक अफ पाकिस्तानको तथ्याङ्कले देखाएको छ ।

सेप्टेम्बर २०२३ र अगस्ट २०२४ को बीचमा संघीय सरकारको ऋण ६,३९२ अर्ब रुपैयाँले बढेको छ। अगस्ट २०२४ सम्म, आन्तरिक ऋण ४८,३३९ अर्ब रुपैयाँ थियो भने बाह्य ऋण २२,०२३ अर्ब रुपैयाँ थियो।